:
:
La parola porta pisu
Lu piritu porta surrisu
‘A paruledda menu porta ‘a paci
la verita la dichiara chi nun taci
e ‘nna li discussioni cu l’amici
megliu parola è chidda ch‘un si dici
‘Sta liggi è ‘na liggi universali
‘m mucca s’’un cci su pila cc’è lu sali
la lingua s’è licchetta rumpi l’ossa
e pò purtari l’omu ‘nna la fossa.
Lu parlari scuppanti crea cuntrastu
fa torciri li corna puru a lu crastu
parola mala ditta porta pisu
e causa sciarri puru ‘n Paraddisu
E l’amicizia, puru a cchiù pruvata
veni ‘ntaccata d’’a mala parlata
picchì la cosa didda cu l’arruganza
fa torciri vudedda ne la panza
Penza la cosa e penza a comu ‘a dici
poi s’’un la dici, Diu ti binidici
ni sugnu ben d’accordu, nun discutu
la parola ch’un pisa ‘a dici ‘u mutu.
Com’è chi pò campari in alligria
la genti quannu è in cumpagnia
si la parola porta a li turilli
e ‘a lingua pungi peggiu di li spilli?
Basta fari un piritu a capistru
pi diri l’aiutanti e lu maistru
cancia la cira, ‘nna la cumpagnia
quarcunu ridi e l’autru scaccania
L’arti di piritiari tutti ‘a sannu
pi chissu si scurreggia tuttu l’annu
pò farsi ‘n cumpagnia e macari a sulu
basta usari la trumma di lu culu
Cc’è ‘na varianti ch’è di veru spassu
‘mmeci di trumma pari un contrabbassu
e quannu si cimenta ‘a za Ninetta
la varianti è chidda da trummetta
Cci n’è cu scrusciu semplici e allungatu
ca pari di sciampagnu ch’è sbindatu
lu populu l’ascunta tutti lietu
a cundizioni chi nun fannu fetu
È ‘na cosa chi porta assai alligria
specialmenti s’è fatta ‘n cumpagnia
e cc’è cu’ è cha sciala strati strati
facennu li so pirita ‘ncucchiati
Puru San Petru ‘nna lu Paraddisu
nesci fora e si leva ssu ‘gran pisu
si sforza tanticchia, cci nesci stintatu
l’effettu pari ch’ avi truniatu
Poi p’’u sforzu, cc’allenta la carina
pari chi chiovi, è Petru ch’ orina
lu populu di ‘st’acqua assammaratu
ringrazzia a Diu e a Petru chi ha pisciatu.
Fa ‘granni festa, si metti alligria
vivi, s’abbuffa, e l’ acqua ‘un addisìa
affuncia ‘nna cannata e ‘nno vintinu
varianti prova di lu bombardinu
Me nannu, immeci, s’’a virìa di bruttu
Attrantava e si sfurzava tuttu
poi cci vinia puru lu rovesciu
sbraitannu ripitia:“nun c’arrinesciu!”
dicemu chi cu’ parla è malvistu
cu’ piritìa è misu a primu postu
la parola da sempi porta pisu
mentri ‘u piritu porta lu surrisu.